من راو ستوديو إلى راوبت ورادار لاب: ليش الذكاء الاصطناعي؟

أنا طارق الثاقب، سعودي من الرياض. خلفيتي في الإعلام والاتصال، واشتغلت قرابة 14 سنة في التصوير وإنتاج الفيديو. أسست راو ستوديو في الرياض سنة 2018، وأطلقت راوبت سنة 2026، وأشتغل اليوم أيضًا على رادار لاب. هنا أكتب كيف انتقلت من الكاميرا إلى الذكاء الاصطناعي، وليش ما أشوفه انتقالًا كاملًا.

البداية كانت من الكاميرا

درست الإعلام والاتصال، لكن اللي علّمني الشغل فعلًا كان التصوير. بورتريهات، وصور تجارية للمنتجات والأكل، وتغطيات، وبعدها إنتاج الفيديو. ومع الوقت صرت أشتغل كمنتج تنفيذي على أفلام لعلامات مثل Dunkin' ووزارة الثقافة وstc والمراعي، وبعضها معروض في صفحتي الرئيسية.

الكاميرا علّمتني أشياء ما لها علاقة بالجهاز نفسه: وين الضوء، وش اللي يدخل الكادر ووش اللي يطلع منه، ومتى نعتمد اللقطة ونكمل. وعلّمتني إن كل شغل يبدأ بسؤال بسيط: وش نبي المشاهد يفهم؟ هذا السؤال كتبت عنه في مقال قبل البرومبت، نحتاج فكرة واضحة، وهو للحين أول شي أسأله قبل أي أداة.

راو ستوديو: الإنتاج سلسلة قرارات

في 18 أكتوبر 2018 أسست راو ستوديو في الرياض، عشان نقدّم التصوير والإنتاج للعلامات التجارية بشكل مرتب. في الاستوديو تعلمت إن الإنتاج الجيد ما هو لقطة حلوة وبس. هو بريف واضح، وفريق يعرف دوره، وجدول، ومراجعات في وقتها، وملفات منظمة يقدر العميل يستلمها ويستخدمها.

أكثر شي تعلمته في الاستوديو إن أغلب المشاكل اللي تطلع وقت التصوير أو التسليم أصلها بريف ما كان واضح، أو مرحلة ما انعتمدت في وقتها. ولما يكون البريف واضح والموافقات مرتبة، يصير الشغل أهدأ والنتيجة أقرب للمطلوب.

وهالترتيب هو نفسه اللي أخذته معي لما بدأت أجرّب الذكاء الاصطناعي.

متى دخل الذكاء الاصطناعي في الشغل؟

بدأت بتجارب صغيرة: صورة أحركها، أو خلفية لموقعي، أو تعديل على صورة. وكل تجربة كانت تطلع لي سؤال إنتاجي، مو سؤال تقني. هل التفاصيل تبقى لما نعدّل أكثر من مرة؟ جربت هذا في 40 تعديل متتابع على صورة واحدة. هل نقدر نخلي المشهد يتحرك والكاميرا ثابتة؟ كتبت عنه في كاميرا ثابتة، ومشهد فيه حياة. وهل الدقة الأعلى تعني جودة أعلى؟ هذا في دقة الفيديو وجودة الصورة.

اللي لاحظته إن الأدوات سريعة، لكن أغلبها مبني لشخص يجرّب، مو لفريق تسويق عنده حملة وموعد تسليم وعميل يبي نتيجة يقدر يعتمدها.

مع الوقت لاحظت إن أكبر فرق جابته هالأدوات إن التجربة صارت أرخص بكثير. فكرة كانت تحتاج يوم تصوير عشان نشوفها، صرنا نشوف لها أكثر من نسخة في ساعات. وهنا صار السؤال عندي: كيف نحوّل هالسرعة لشغل منظم يقدر فريق يعتمد عليه؟

راوبت: الأدوات اللي كنت أحتاجها كمنتج

في 2026 أطلقت راوبت، منصة لصناعة المحتوى التجاري بالذكاء الاصطناعي. الفكرة إن صاحب العلامة أو فريق التسويق يلقى أغلب اللي يحتاجه في مكان واحد:

• قوالب جاهزة للمنشورات.
• وكيل يولّد الإعلانات.
• فيديوهات UGC.
• تعديل الصور.
• نماذج لتوليد الفيديو.
• نموذج تعليق صوتي باللهجة السعودية.
• نسخ الإعلانات وتحليل المنافسين.

أكثر شي أهتم فيه هو التعليق الصوتي السعودي. الإعلان اللي يخاطب جمهور سعودي يحتاج صوت يتكلم مثله، وهذا من أكثر الأشياء اللي كنا نتعب عليها في الإنتاج التقليدي.

وللأمانة: أنا مؤسس راوبت. فلما أكتب عنها هنا أو أقارنها بأدوات ثانية، خذ كلامي وأنت عارف هالشي.

رادار لاب: نفس الفكرة على الخبر

رادار لاب تجربة إعلامية من الرياض، تقدّم أخبار الذكاء الاصطناعي بالعربية، مكتوبة ومسموعة كإذاعة تقدر تسمعها في أي وقت. النشر فيها آلي، وقبل ما ينزل أي خبر يمر على فحص للمصادر.

ليش الفحص؟ لأن الأتمتة تسرّع النشر، لكن ثقة القارئ تقوم على المصدر. وهذا نفس درس الإنتاج: السرعة ما تفيد إذا ما عرفنا وش اللي نعتمده.

هل تركت الكاميرا؟

لا. اللي تغيّر هو الطريقة اللي أوصل فيها للنتيجة، مو المعيار اللي أحكم فيه عليها. للحين أراجع الضوء والتكوين والتفاصيل، وللحين أعتمد كل مرحلة قبل اللي بعدها، وللحين أبدأ من البريف.

مثلًا، قبل أي تصوير صرت أقدر أجرّب أكثر من اتجاه بصري للإضاءة والألوان والتكوين، وأعرضها على الفريق قبل ما نبدأ. هذا ما يغني عن التصوير، لكنه يخلي النقاش على شي نشوفه بدل وصف بالكلام.

الفرق إن التجربة صارت أسرع وأرخص، فصرنا نقدر نجرّب أفكار أكثر قبل ما نقرر. بس القرار نفسه ما زال عند الشخص اللي يعرف وش يبي.

وش تلقى في هالمدونة

أكتب هنا تجارب وملاحظات من داخل الشغل: اختبارات على نماذج الصور والفيديو والصوت، وطريقة شغلي من البريف إلى التسليم. وإذا عندك مشروع أو سؤال، تواصل معي من صفحة التواصل.

In English (short summary)

Tariq Althaqib (طارق الثاقب) is a Saudi creative and producer based in Riyadh, with a media and communication background and about 14 years in photography and video production. He founded RAW Studio (rawstudiosa.com) in Riyadh on 18 October 2018 and launched RAWBIT (therawbit.ai), an AI platform for commercial content with a Saudi-dialect voice-over model, in 2026. He also runs Radar Lab (radarlab.news), an Arabic AI news site and radio with automated publishing and source checks.